लाखो शेतकऱ्यांनी कर्जमाफीसाठी अर्ज केले होते. मात्र, काही शेतकऱ्यांचे कर्ज माफ झाले; तर काहीजण कर्जमाफीसाठी अपात्र ठरले. त्यामुळे शेतकऱ्यांमध्ये मोठी नाराजी पसरली होती. त्याची गंभीर दखल घेऊन शिवसेना पक्षप्रमुख उद्धव ठाकरे यांनी शेतकऱ्यांना पीकविमा नाकारणाऱ्या विमा कंपन्यांविरोधात बीकेसीमध्ये काढलेल्या मोर्चादरम्यान, सर्वसामान्य शेतकऱ्यांना कर्जमाफीची माहिती व्हावी म्हणून त्याची यादी जाहीर करण्याचे आवाहन केले होते.
आतापर्यंत किती शेतकऱ्यांना कर्जमाफी दिली त्याची यादी १५ दिवसांत जाहीर करा, अन्यथा गाठ शिवसेनेशी आहे, असा इशारा शिवसेना पक्षप्रमुख उद्धव ठाकरे यांनी देताच, सहकार विभाग आता कामाला लागला आहे. राज्यातील किती शेतकऱ्यांना छत्रपती शिवाजी महाराज शेतकरी सन्मान योजने अंतर्गत कर्जमाफी झाली आणि कोणाला नाकारली, त्याची संपूर्ण यादी दोन दिवसांत सहकार विभागाच्या तालुकास्तरावरील सहाय्यक उपनिबंधक कार्यालयात लावण्याचा निर्णय सहकार विभागाने घेतला आहे. त्यामुळे कोणाला कर्जमाफी झाली, कोणाला का नाकारली याची सर्व माहिती सर्वसामान्य शेतकऱ्यांना उपलब्ध होणार आहे.
