मुंबई: हैदराबाद येथील डॉक्टर तरुणीवर बलात्कार करून तिची जाळून हत्या केल्याची घटना नुकतीच घडली. या घटनेचे पडसाद मुंबईसह महाराष्ट्रील विविध भागांत उमटले. विविध संघटना, संस्थांनी या घटनेचा निषेध करून आरोपींना कठोर शिक्षा करण्यात यावी, अशी मागणी करण्यात आली. या घटनेमुळं अवघं देश हादरलं असतानाच मुंबई उपनगरातील कुर्ला येथे सहा वर्षाच्या मुलीवर बलात्कार झाल्याची घटना समोर आली आहे.
कुर्ला पश्चिमेकडे एका दुकानदाराने चॉकलेट देण्याच्या बहाण्यानं सहा वर्षांच्या मुलीवर अत्याचार केले. विजय महल चाळीजवळ या नराधमाचं दुकान आहे. दुकानाबाहेर खेळणाऱ्या मुलीला चॉकलेट देतो असे सांगून त्यानं दुकानात बोलावले आणि तिच्यावर लैंगिक अत्याचार केले. घरी गेल्यानंतर वेदना होऊ लागल्याने मुलीने आईला सांगितले. वेदना असह्य होत असल्याने तिला डॉक्टरकडे नेले असता, लैंगिक अत्याचार झाल्याचे निष्पन्न झाले. दुकानदाराबाबत मुलीने सांगताच तिच्या पालकांनी पोलिसांत तक्रार केली. त्यांच्या तक्रारीवरून विनोबा भावे नगर पोलिसांनी गुन्हा दाखल केला आणि आरोपीला अटक केली आहे.
