मुंबई: लोकसभा निवडणुकीमध्ये राज ठाकरे यांनी पंतप्रधान नरेंद्र मोदी आणि भाजप यांच्यावर जोरदार टीका केली होती. महाराष्ट्राच्या विधानसभा निवडणुकीत राज ठाकरे यांनी शिवसेनेला लक्ष केले होते. मात्र, निवडणूक निकालानंतर शिवसेनेने भाजपशी काडीमोड घेत ‘हीच ती वेळ’ साधली. राष्ट्रवादी काँग्रेस आणि काँग्रेसशी हातमिळवणी करत महाविकास आघाडी सरकारची स्थापना केली. यामुळे मनसे कार्यकर्ते संभ्रमात आहेत. तर दुसरीकडे, वाडा येथे भाजपच्या बॅनरवर राज ठाकरे यांचा फोटो पाहायला मिळाल्यामुळे नवे राजकीय समीकरण तयार होतेय का, अशीही चर्चा सुरू झाली आहे. त्यामुळे कुठल्या तरी एका विचारसरणीच्या पक्षासोबत जाऊन राजकारण करायला हवे, असे मत मनसे कार्यकर्त्यांकडून व्यक्त केले जात आहे.
मनसेच्या मराठी कार्डाचा प्रभाव ओसरताना दिसत आहे. २०१४ आणि २०१९ सालच्या विधानसभा निवडणुकांमध्ये मनसेचा फक्त एकच आमदार निवडून आला. त्यामुळेच आता मनसे अध्यक्ष राज ठाकरे हिंदुत्वाचा मुद्दा हाती घेऊन पुढची खेळी खेळणार असल्याची चर्चा राजकीय वर्तुळात रंगली आहे. काँग्रेस-राष्ट्रवादीला बरोबर घेऊन महाराष्ट्रात सत्ता स्थापन केलेल्या शिवसेनेला शह देण्यासाठी आता मनसे पुन्हा एकदा रिंगणार उतरणार असल्याचे समजते.
राज्यातील बदलती राजकीय परिस्थिती, महाराष्ट्र नवनिर्माण सेनेचा ओसरता प्रभाव आणि शिवसेनेला मात देण्यासाठी मनसे अध्यक्ष राज ठाकरे पक्षाच्या झेंड्याचा रंग बदलण्याची तयारी करत असल्याची माहिती सूत्रांकडून मिळाली आहे.
मनसेच्या झेंड्याचा रंग बदलण्यावर पक्षांतर्गत विचारविनिमय झाला आहे. मनसेचा झेंडा आता भगवा किंवा केशरी रंगाचा असेल. तसेच या झेंड्यावर राजमुद्राही असेल. लवकरच यावर शिक्कामोर्तब केले जाईल. शिवसेना प्रमुख बाळासाहेब ठाकरे यांच्या जयंतीदिनी मनसे आपल्या नव्या झेंड्याचे अनावरण करेल, अशी माहिती सूत्रांकडून देण्यात आली आहे.
सध्याच्या मनसेच्या झेंड्याचा रंग निळा, भगवा आणि हिरवा आहे. २३ जानेवारी २०२० रोजी मनसेचे महाअधिवेशन पार पडणार असून, या अधिवेशनात राज ठाकरे पक्षाला नवी दिशा देणार आहेत.
महाविकास आघाडीच्या स्थापनेनंतर शिवसेना हिंदुत्वाच्या मुद्द्याबाबात मवाळ भूमिका घेत असल्याची चर्चा असून, ती पोकळी भरून काढण्यासाठी मनसे आता नवी भूमिका स्वीकारणार असल्याचे बोलले जात आहे. पक्षवाढीसाठी आणि भविष्यातील मुंबई महानगरपालिकेच्या निवडणुका डोळ्यासमोर ठेवून तसेच अस्तित्व टिकवण्यासाठी राज ठाकरे यांची भाजपबाबत असलेली भूमिका मवाळ होण्याची शक्यता आहे.
