मुंबई: बाप्पाच्या आगमनाची लगबगीने तयारी करणारे भाविक मात्र आज बाप्पाला निरोप देताना भावूक झाले होते.पारंपारिक वेषात बाप्पाची मिरवणूक काढण्यात आली. या मिरवणुकांमध्ये महिला आणि लहान मुलंही मोठ्या प्रमाणावर सहभागी झाले होते. ढोलताशाचा दणदणाटात गणपती बाप्पा मोरया, पुढच्या वर्षी लवकर याच्या घोषणा देत या मिरवणुका निघाल्याने मुंबई, ठाणे, पुणे, औरंगाबाद, नाशिक, नगर, नागपूर, अमरावती, रत्नागिरी, नवी मुंबई, रायगडसह संपूर्ण राज्यातील रस्ते फुलून गेले होते.
विसर्जन मिरवणुकांनी अवघी मुंबापुरी दुमदुमून गेली होती. सायंकाळी सहा वाजेपर्यंत मुंबईत ९ हजार बाप्पांना निरोप देण्यात आला होता. त्यात ३८३ सार्वजनिक, ८९१८ घरगुती गणपतींसह ६४ गौरींचाही समावेश होता. सायंकाळी ५ वाजेच्या सुमारास लालबागचा राजा चिंचपोकळी पुलावरून मार्गस्थ झाला. यावेळी लालबागच्या राजाला निरोप देण्यासाठी विसर्जन मिरवणुकीत लाखो भाविक सहभागी झाले होते. मुख्यमंत्री देवेंद्र फडणवीस यांनीही वर्षा निवास्थानी गणरायाचे पर्यावरणपूरक विसर्जन केले. गणेश विसर्जनावेळी कोणताही अडथळा येऊ नये म्हणून ५३ रस्ते वाहतुकीसाठी पूर्णपणे बंद ठेवण्यात आले होते. मुंबईत तब्बल ५० हजार पोलीस तैनात ठेवण्यात आले होते. या विसर्जन मिरवणुकांवर ५ हजार सीसीटीव्ही कॅमेऱ्यांचा वॉच ठेवण्यात आला होता.
टाळ-मृदुंगाच्या गजरात… लेझिमच्या तालात… गुलाल उधळत आज राज्यभरात बाप्पाच्या विसर्जन मिरवणुका काढण्यात आल्या. ‘गणपती बाप्पा मोरया, पुढच्या वर्षी लवकर या’, ‘गणपती चालले गावाला, चैन पडेना आम्हाला…’ असा जयघोष करत पाणावलेल्या डोळ्यांनी संपूर्ण राज्यभरात विघ्नहर्त्या गणरायचं विसर्जन सुरू आहे.
