आंतरराष्ट्रीय महिला दिनानिमित्त विविध क्षेत्रातील कर्तृत्ववान महिलांचा होणार गौरव
नवी मुंबई:
स्त्री शक्तीचा सन्मान आणि समाजातील महिलांच्या उल्लेखनीय कार्याचा गौरव करण्यासाठी ‘प्रगती फाऊंडेशन’च्या वतीने ‘उड्डाण: एक झेप स्वावलंबनासाठी’ या विशेष कार्यक्रमाचे आयोजन करण्यात आले आहे. आंतरराष्ट्रीय महिला दिनाचे औचित्य साधून शनिवार, ७ मार्च २०२६ रोजी जुईनगर येथील डॉ. बाबासाहेब आंबेडकर समाज मंदिर हॉलमध्ये हा सोहळा संपन्न होणार आहे.
या कार्यक्रमांतर्गत समाजातील विविध स्तरांत जिद्दीने काम करणाऱ्या महिलांना प्रतिष्ठित पुरस्कारांनी सन्मानित करण्यात येणार आहे. यामध्ये प्रामुख्याने ‘प्रगती स्वावलंबन पुरस्कार’, ‘प्रगती समाज सेवा पुरस्कार’, ‘प्रगती वीरांगना पुरस्कार’, ‘प्रगती शैक्षणिक उत्कृष्टता पुरस्कार’ आणि ‘प्रगती जीवनगौरव पुरस्कार’ प्रदान केले जाणार आहेत.
केवळ पुरस्कार सोहळाच नव्हे, तर महिलांच्या सुप्त गुणांना वाव देण्यासाठी यावेळी विविध सांस्कृतिक कार्यक्रमांचे आणि स्पर्धांचेही आयोजन करण्यात आले आहे. उपस्थित महिलांसाठी भेटवस्तू वितरण आणि स्नेहभोजनाची व्यवस्था देखील फाऊंडेशनतर्फे करण्यात आली आहे.
प्रगती फाऊंडेशनच्या सौ. सिद्धी राणे यांनी या कार्यक्रमाबाबत माहिती देताना सांगितले की, “महिलांच्या जिद्द आणि कर्तृत्वाला दाद देण्यासाठी हा एक छोटासा प्रयत्न आहे. या सोहळ्याला जास्तीत जास्त महिलांनी उपस्थित राहून कार्यक्रमाची शोभा वाढवावी.”
कार्यक्रमाचा तपशील:
* दिनांक: शनिवार, ७ मार्च २०२६
* वेळ: सायंकाळी ४.०० ते ७.००
* स्थळ: डॉ. बाबासाहेब आंबेडकर समाज मंदिर हॉल, जुईनगर, नवी मुंबई.
या कार्यक्रमासाठी नाव नोंदणी करणे आवश्यक असून, अधिक माहितीसाठी इच्छुकांनी फाऊंडेशनच्या ९९२०९८०६१३ या क्रमांकावर संपर्क साधण्याचे आवाहन करण्यात आले आहे.
