होळीसाठी विकल्या जाणाऱ्या एक हजार पिशव्या अवघ्या ५० ते ६० रुपयांना
मशिद बंदर मार्केट येथे उपलब्ध आहेत. या पिशव्या दुधाच्या पिशव्यांच्या नावाखाली विकल्या
जात आहेत. विशेष म्हणजे पालिका कर्मचारी निवडणूक कामांमध्ये व्यस्त असल्याने विक्रेत्यांविरुद्धची
कारवाई थंडावली आहे.
सध्या बाजारात असलेल्या प्लास्टिक पिशव्यांवर जाडीसंदर्भात कोणतीही माहिती नमूद
केलेली नाही. या पिशव्या अत्यंत पातळ आहेत. महापालिकेने पातळ पिशव्यांवर बंदी आणलेली
असताना या पिशव्या अजूनही बाजारात उपलब्ध आहेत आणि त्याची खुलेआम विक्रीसुद्धा होते.
मशिद बंदर येथे कोणतीही हरकत न घेता या पिशव्यांची विक्री होत आहे. तर स्थानिक बाजारपेठेमध्ये
दंडाच्या कारवाईची भीती असली तरीही या पिशव्यांची विक्री करण्यासाठी दुकानदार तयार
आहेत. दंडाच्या भीतीने या पिशव्या फक्त लपवून ठेवतो, असे दुकानदार स्पष्ट करतात. यामध्ये
ग्राहकांना प्लास्टिक पिशव्यांमध्ये पाणी भरून त्या पिशव्या मारण्याची लागलेली सवय
मोठ्या प्रमाणात कारणीभूत आहे. प्लास्टिक बंदी झाल्यानंतरही मागणी कायम असल्याने तसेच
कमी जाडीच्या प्लास्टिक पिशव्यांच्या खरेदी-विक्रीनंतरही कठोर कारवाई होत नसल्याने
हा व्यवहार सर्रास सुरू असल्याचे समोर येते.
महापालिकेच्या दुकाने आणि आस्थापना विभागातील ९५ टक्के कर्मचारी
निवडणूक कामामध्ये व्यस्त असल्याने होळीच्या पार्श्वभूमीवर प्लास्टिक पिशव्यांवर या
विभागाकडून कोणतीही ठोस कारवाई झालेली नाही, असे दुकाने व आस्थापना विभागाच्या
मुख्य अधिकारी सुनीता जोशी यांनी स्पष्ट केले.
